कोकण आणि पश्चिम महाराष्ट्रातील धान उत्पादक तसेच जमीन खरडून गेलेल्या १० लाखाहून अधिक शेतकऱ्यांना मिळणार मदत.
६६३ कोटींच्या प्रस्तावाला मंजुरी
अतिवृष्टी आणि पूर परिस्थितीमुळे बाधित झालेल्या, परंतु अद्यापही शासनाची नुकसान भरपाई न मिळालेल्या शेतकऱ्यांसाठी एक अतिशय दिलासादायक अपडेट समोर आली आहे. नागपूर हिवाळी अधिवेशनाच्या पूर्वसंध्येलाच राज्य शासनाच्या माध्यमातून नुकसानग्रस्त झालेल्या शेतकऱ्यांना मदतीचे वितरण करण्यासाठी ६६३ कोटी रुपयांचा नवीन प्रस्ताव मंजूर करण्यात आला आहे.
या मंजुरीमुळे राज्यातील १० लाखांपेक्षा जास्त शेतकऱ्यांना मदतीचे वितरण करण्यासाठी लवकरच निधी उपलब्ध होणार आहे.
प्रलंबित मदतीची सद्यस्थिती
यापूर्वीच राज्य शासनाच्या माध्यमातून विविध जिल्ह्यांसाठी जवळजवळ २० हजार कोटी रुपयांच्या आसपासची रक्कम मंजूर करण्यात आलेली आहे. यापैकी १३,५०० कोटी रुपयांचे वितरण झाले आहे आणि ५,८०० कोटी रुपयांच्या आसपासची रक्कम अद्यापही शेतकऱ्यांच्या खात्यामध्ये वितरित होणे बाकी आहे.
मागील मंजूर प्रस्तावांमध्ये काही जिल्ह्यांचे प्रस्ताव बाकी होते, तर काही जिल्ह्यांचे प्रस्ताव शासनाकडे मंजूर झालेले नव्हते. अशा प्रलंबित प्रस्तावांसाठीच आता ६६३ कोटी रुपयांची रक्कम मंजूर करण्यात आली आहे.
नवीन प्रस्तावात समाविष्ट झालेले शेतकरी
या नवीन प्रस्तावामध्ये प्रामुख्याने ज्या शेतकऱ्यांचे प्रस्ताव प्रतीक्षेत होते, त्यांचा समावेश आहे:
-
धान उत्पादक शेतकरी: शेवटची जी काही अतिवृष्टी झाली, त्यात कोकणासह पश्चिम महाराष्ट्र आणि उत्तर महाराष्ट्रातील जिल्ह्यांमध्ये धान पिकाचे मोठे नुकसान झाले होते. अशा धान उत्पादक शेतकऱ्यांच्या झालेल्या नुकसानीचा प्रस्ताव आता मंजूर झाला आहे.
-
जमीन खरडून गेलेले शेतकरी: सोलापूर आणि इतर काही जिल्ह्यांमध्ये जमीन खरडून गेलेल्या शेतकऱ्यांचे प्रस्ताव देखील अद्याप प्रतीक्षित होते. या शेतकऱ्यांचाही या नवीन प्रस्तावात समावेश आहे.
मदत व पुनर्वसन विभागाच्या माध्यमातून हे सर्व प्रतीक्षित असलेले प्रस्ताव आता स्वाक्षरीत करण्यात आले आहेत.
पुढील कार्यवाही
मदतीच्या प्रतीक्षेत असणाऱ्या शेतकऱ्यांसाठी हा एक अत्यंत महत्त्वाचा निर्णय आहे. या संदर्भातील शासकीय निर्णय (GR) लवकरच निर्गमित केला जाण्याची शक्यता आहे, ज्यामुळे ही रक्कम मदतीच्या वितरणासाठी पुढे उपलब्ध करून दिली जाईल आणि पात्र शेतकऱ्यांना त्यांच्या खात्यात नुकसान भरपाईची रक्कम प्राप्त होईल.
