उत्तरेकडील थंड वाऱ्यांमुळे कोरडे हवामान; ग्रामीण भागात तापमान ६ अंश सेल्सिअसपर्यंत खाली येण्याची शक्यता.
कडाक्याची थंडी आणि कोरडे हवामान
या आठवड्यात (९ ते १५ डिसेंबर २०२५ दरम्यान) राज्यातील हवामानामध्ये मोठा बदल होणार असून, उत्तरेकडून येत असलेल्या थंड वाऱ्यांमुळे राज्यात थंडी मोठ्या प्रमाणात वाढणार आहे. हवामान पूर्णपणे कोरडं राहील. या आठवड्यात राज्यातील बहुतांश भागांमध्ये कडाक्याची थंडी अनुभवायला मिळेल; मागील दोन-तीन वर्षांत इतकी तीव्र थंडी पडली नव्हती. या आठवड्यात कोणत्याही प्रकारच्या पावसाचा कसलाही अंदाज नाही. थंडी हळूहळू विदर्भ, मराठवाडा, उत्तर महाराष्ट्र आणि त्यानंतर पश्चिम महाराष्ट्रात वाढत जाईल, असा हवामान विभागाचा अंदाज आहे.
विदर्भ, मराठवाडा आणि मध्य महाराष्ट्रात मोठी घसरण
राज्यातील अनेक प्रमुख भागांमध्ये तापमानात चांगली घट झाली असून, विदर्भ, मराठवाडा आणि मध्य महाराष्ट्रात थंडीचा कडाका वाढलेला आहे. नागपूर, भंडारा, गोंदिया, अमरावती आणि यवतमाळच्या भागात तापमानात चांगली घसरण झाली आहे. मराठवाड्यातही तापमान १० अंश सेल्सिअस पर्यंत खाली आले आहे. अहिल्यानगर (अहमदनगर), जेऊर, करमाळा या भागांसह उत्तर महाराष्ट्रात तापमान १० अंश सेल्सिअसपेक्षाही कमी झाले आहे.
