मागणीनुसार ई-केवायसी प्रक्रिया आता सोपी; घटस्फोटीत, विधवा महिलांसाठी नवे पर्याय समाविष्ट. अंतिम मुदत: ३१ डिसेंबर २०२५.
ई-केवायसी प्रक्रियेत मोठे बदल
‘मुख्यमंत्री माझी लाडकी बहीण योजना’ च्या ई-केवायसी (e-KYC) प्रक्रियेत अखेर पात्र महिलांच्या मागणीनुसार महत्त्वपूर्ण बदल करण्यात आले आहेत. या बदलांमुळे पूर्वी असलेले चुकीचे आणि संभ्रम निर्माण करणारे प्रश्न आता वगळण्यात आले आहेत. प्रक्रिया अधिक सोपी आणि पारदर्शक झाल्यामुळे, ज्या महिलांनी पूर्वी केवायसी केली असेल आणि त्यांच्या मनात संभ्रम असेल, किंवा ज्यांच्याकडून काही प्रश्नांची उत्तरे देताना गडबड झाली असेल, त्या आता नव्याने केवायसी करू शकतात. तसेच, ज्या पात्र महिलांची केवायसी अजून झालेली नाही, त्याही आता ही प्रक्रिया सहजपणे पूर्ण करू शकतात. घटस्फोटीत, विधवा महिला आणि ज्यांचे वडील किंवा पती हयात नाहीत, अशा विशिष्ट प्रवर्गातील महिलांसाठी आवश्यक पर्याय यात समाविष्ट करण्यात आले आहेत.
केवायसी करण्यासाठी ऑनलाईन प्रक्रिया
केवायसी करण्यासाठी, लाभार्थ्यांनी प्रथम ladkibahin.maharashtra.gov.in या अधिकृत संकेतस्थळाला भेट देणे आवश्यक आहे. मोबाईलवरून प्रक्रिया करत असल्यास, उजव्या बाजूला असलेल्या तीन बिंदूंवर क्लिक करून पेज ‘डेस्कटॉप मोड’ मध्ये टाकून घ्यावे, ज्यामुळे प्रश्नांची उत्तरे निवडताना कोणतीही चूक होणार नाही. संकेतस्थळावर ‘ई-केवायसी प्रक्रिया’ या पर्यायावर क्लिक केल्यानंतर, तुम्हाला आपला आधार क्रमांक आणि कॅप्चा कोड टाकून सहमती द्यावी लागते. यानंतर, आधार संलग्न मोबाईल क्रमांकावर आलेला ओटीपी (OTP) प्रविष्ट करून प्रक्रिया पुढे सुरू होते.
