उत्तर भारतातून आलेल्या थंड वाऱ्यांमुळे कडाक्याची थंडी; १० आणि ११ डिसेंबरसाठी ‘यलो अलर्ट’ जारी.
सध्याची तापमानाची स्थिती (९ डिसेंबर)
राज्याच्या अनेक भागांमध्ये तापमानाचा पारा सरासरीपेक्षा लक्षणीय खाली घसरला आहे. ९ डिसेंबरच्या सकाळी, जेऊर-करमाळा येथे सर्वात कमी ६.०°C तर मोहळ येथे ६.९°C तापमानाची नोंद झाली. याशिवाय, विदर्भ आणि मध्य महाराष्ट्रातील प्रमुख शहरांमध्येही थंडीचा जोर वाढला आहे. पुणे (शिवाजीनगर) येथे ८.९°C, नागपूर येथे ८.८°C, जळगाव येथे ८.४°C आणि नाशिक येथे ९.३°C इतके तापमान पाहायला मिळाले. उत्तरेकडील थंड आणि कोरडे वारे वाहत असल्याने ही स्थिती निर्माण झाली आहे.
पुढील २४ तासांसाठी हवामान अंदाज
पुढील २४ तासांतही राज्यात कडाक्याची थंडी कायम राहण्याची शक्यता आहे. काही भागांमध्ये तापमान ८ अंश सेल्सिअसच्या खाली जाण्याची शक्यता आहे. यात प्रामुख्याने सोलापूर-करमाळ्याचा भाग, पुणे (शिवाजीनगर) परिसर आणि अहिल्यानगर या जिल्ह्यांचा समावेश आहे. तसेच, नागपूर, भंडारा, गोंदिया, यवतमाळ या विदर्भातील जिल्ह्यांमध्येही तापमान ८ अंश सेल्सिअसपर्यंत खाली घसरण्याची शक्यता आहे. नाशिक, मालेगाव आणि जळगाव येथे तापमान ८ ते १० अंश सेल्सिअसच्या दरम्यान राहील.
या जिल्ह्यांना थंडीच्या लाटेचा ‘यलो अलर्ट’
हवामान विभागाने राज्यातील अनेक जिल्ह्यांसाठी थंडीच्या लाटेचा (Cold Wave) यलो अलर्ट जारी केला आहे.
-
१० डिसेंबरसाठी ‘यलो अलर्ट’: नागपूर, गोंदिया, यवतमाळ, सोलापूर, अहिल्यानगर, नाशिक घाट, नाशिक पूर्व, धुळे, नंदुरबार आणि जळगाव.
-
११ डिसेंबरसाठी ‘यलो अलर्ट’: नंदुरबार, धुळे, नाशिक घाट, नाशिक पूर्व, जळगाव, छत्रपती संभाजीनगर, जालना, बीड, परभणी, अहिल्यानगर, पुणे पूर्व, पुणे घाट आणि सोलापूर.
कोकण आणि मुंबईतील तापमान
कोकण किनारपट्टीवरही थंडीचा परिणाम जाणवणार आहे, मात्र येथील तापमान मध्य महाराष्ट्रापेक्षा जास्त असेल. मुंबई (सांताक्रूझ) येथे तापमान १५°C ते १७°C आणि कुलाबा येथे २०°C च्या आसपास राहण्याची शक्यता आहे. रत्नागिरी-सिंधुदुर्ग किनारपट्टीवर १८°C ते २०°C तापमान राहील, तर अंतर्गत ठाणे आणि पालघर भागांमध्ये तापमान १०°C ते १५°C पर्यंत खाली उतरण्याची शक्यता आहे.
